به‌ تاوانی كوشتنی مه‌واد فرۆشه‌كان گیراون

له‌ كاتێكدا كه‌ له‌ شاری بۆكانی رۆژهه‌ڵاتی كوردستان 11 كه‌س به‌ تاوانی كوشتنی چه‌ندین فرۆشیاری ماده‌ی هۆشبه‌ر، قۆڵبه‌ست كراون، پێرێ شه‌و مه‌واد فرۆشێكی تر كوژرا.  

هه‌واڵنێرمان له‌ شاری بۆكان پێی راگه‌یاندین: له‌ چه‌ند مانگی رابردوو دا چه‌ندین كه‌س كه‌ خه‌ریكی فرۆشتنی ماده‌ی هۆشبه‌ر بوون له‌ لایه‌ن كه‌سانی نه‌ناسراوه‌وه‌ كوژران و له‌ ناو خه‌ڵك دا وا بڵاو ببۆوه‌ كه‌ ئه‌و كه‌سانه‌ له‌ لایه‌ن هێزه‌كانی پژاكه‌وه‌ كوژراون.

ماوه‌یه‌ك له‌مه‌وبه‌ریش مه‌واد فرۆشێك به‌ ناوی "ئازاد ستایش" له‌ شاری بۆكان كوژرا و پاش ئه‌وه‌ 11 كه‌س له‌ لایه‌ن هێزه‌كانی سوپای پاسداران و هێزی ئینتیزامیی ئه‌و شاره‌وه‌ قۆڵبه‌ست كران و پرۆپاگه‌نده‌یه‌كی سه‌یریشیان به‌ گرتنی ئه‌و 11 كه‌سه‌ كرد. به‌ شێوه‌یه‌ك كه‌ له‌ ده‌وری مه‌یدانی ئازادی (فه‌رمانداری) لافیته‌ (پلاكارد)یان لێدابوو و نووسرابوو: "خه‌ڵكی بۆكان ئاگادار بن كه‌ سوپای پاسداران و هێزی ئینتیزامی ئاسایشی ئێوه‌ ده‌پارێزن."

به‌ پێی راپۆرتی هه‌واڵنێرمان: ئه‌و 11 كه‌سه‌ی كه‌ گیراون له‌ لێپرسینه‌وه‌كان دا دانیان به‌ كوشتنی چه‌ند كه‌سێكدا ناوه‌ به‌ڵام گوتویانه‌: ئێمه‌ سه‌ر به‌ هیچ رێكخراوه‌ و حیزبێك نین و ته‌واو سه‌ربه‌خۆین و "ئازاد ستایش" مان نه‌كوشتووه‌ و كه‌سانێكی مه‌نفووری ترمان كوشتووه‌.

وه‌ك باس ده‌كرێ به‌ پێی ئه‌وه‌ی كه‌ پێشتر پارتی ژیانی ئازادی كوردستان، پژاك، به‌رپرسیارێتیی كوشتنی ئازاد ستایشی وه‌ئه‌ستۆ گرتبوو، حكوومه‌تی ئێران ده‌یهه‌وێ كوشتنی ئازاد ستایش بخاته‌ ئه‌ستۆی ئه‌و كه‌سانه‌ و ئه‌وان به‌ ئیش كردن بۆ پژاك تاوانبار بكا.

هه‌ر بۆیه‌ بۆ به‌رپه‌رچ دانه‌وه‌ و پووچه‌ڵ كردنه‌وه‌ی ئه‌و پلانه‌ی حكومه‌ت، هێزه‌كانی پژاك شه‌وی پێنجشه‌ممه‌ له‌ سه‌ر هه‌ینی له‌ گه‌ڕه‌كی به‌رامبه‌ر نه‌خۆشخانه‌ی كۆنی شاری بۆكان، مه‌واد فرۆشێكی تر به‌ ناوی "حسێن قازی نیا"یان به‌ ده‌مانچه‌ كوشتووه‌.