له‌یلا زانا: كورده‌كان به‌ كورد و كوردستان دڵخۆش ده‌بن

په‌رله‌مانتاری پێشووی dep  له‌یلا زانا له‌ دادگای دیاربه‌كر داكۆكیی له‌ قسه‌كانی خۆی، له‌ سه‌روبه‌ندی هه‌ڵبژاردنه‌كانی توركیه‌ كرد و وتی: ناوی ئه‌و جێگایه‌ی كه‌ كوردی لێ ده‌ژی كوردستانه‌و كورد له‌ سه‌ر ئه‌و خاكه‌ ده‌حه‌سێته‌وه‌و پێی دڵخۆشه‌، له‌ به‌ر ئه‌وه‌شه‌ كه‌ ئه‌و به‌رده‌وام وشه‌ی كوردستان له‌ قسه‌كانی دا به‌ كار دێنێ. 

له‌ یلا زانا وتی: مه‌به‌ستی ئه‌و له‌ كوردستان، پارچه‌پارچه‌كردنی خاكی توركیا نییه‌، به‌ڵكوو قسه‌ كردن له‌ سه‌ر هه‌رێمێكی جوغرافیایی جیاوازه‌ كه‌ توركیا ناتوانێ به‌ سیستمێكی مه‌كه‌زی و له‌ ئانكارا ئیداره‌ی ئه‌و هه‌رێمه‌ بكات، بۆیه‌ ده‌یه‌وێت سیستمی ئییاله‌تی به‌ كار بهێنرێ.

ئه‌و هه‌روه‌ها وتی: مه‌سه‌له‌ ناوی كوردستانه‌ و له‌ مێژوو دا واهاتووه‌ كه‌ ئه‌و جێیه‌ی كه‌ میلله‌تێك تێیدا ده‌ژیت هه‌ر به‌ ناوی ئه‌و میلله‌ته‌ ناو ده‌برێ. ئه‌و شوێنه‌ی كه‌ كوردیشی تێدا ده‌ژی ناوی نراوه‌ كوردستان و له‌ سه‌رده‌می عوسمانییه‌كانیشه‌وه‌، هه‌تا هاتنه‌ سه‌ركاری حكومه‌تی كۆماری، ئه‌و ناوه‌ به‌ كار هاتووه‌.

شایانی باسه‌ دادگای توركیه‌ به‌هۆی ئه‌وه‌ كه‌ پێشتر له‌یلا زانا كه‌ به‌ كوردی قسه‌ی كردبوو، تاوانی رێكخستنی تیرۆریستان و ژێر پێ خستنی یاسای هه‌ڵبژاردنیان وه‌ئه‌ستۆ خستبوو.